గంగాతరంగరమణీయజటాకలాపం
గౌరీనిరన్తరవిభూషితవామభాగమ్ ।
నారాయణప్రియమనంగమదాపహారం
వారాణసీపురపతిం భజ విశ్వనాథమ్ ॥ 1 ॥
వాచామగోచరమనేకగుణస్వరూపం
వాగీశవిష్ణుసురసేవితపాదపీఠమ్ ।
వామేనవిగ్రహవరేణకలత్రవన్తం
వారాణసీపురపతిం భజ విశ్వనాథమ్ ॥ 2 ॥
భూతాధిపం భుజగభూషణభూషితాంగం
వ్యాఘ్రాజినాంబరధరం జటిలం త్రినేత్రమ్ ।
పాశాంకుశాభయవరప్రదశూలపాణిం
వారాణసీపురపతిం భజ విశ్వనాథమ్ ॥ 3 ॥
శీతాంశుశోభితకిరీటవిరాజమానం
భాలేక్షణానలవిశోషితపంచబాణమ్ ।
నాగాధిపారచితభాసురకర్ణపూరం
వారాణసీపురపతిం భజ విశ్వనాథమ్ ॥ 4 ॥
పంచాననం దురితమత్తమతంగజానాం
నాగాన్తకం దనుజపుంగవపన్నగానామ్ ।
దావానలం మరణశోకజరాటవీనాం
వారాణసీపురపతిం భజ విశ్వనాథమ్ ॥ 5 ॥
తేజోమయం సగుణనిర్గుణమద్వితీయం
ఆనన్దకన్దమపరాజితమప్రమేయమ్ ।
నాగాత్మకం సకలనిష్కలమాత్మరూపం
వారాణసీపురపతిం భజ విశ్వనాథమ్ ॥ 6 ॥
రాగాదిదోషరహితం స్వజనానురాగం
వైరాగ్యశాన్తినిలయం గిరిజాసహాయమ్ ।
మాధుర్యధైర్యసుభగం గరలాభిరామం
వారాణసీపురపతిం భజ విశ్వనాథమ్ ॥ 7 ॥
ఆశాం విహాయ పరిహృత్య పరస్య నిన్దాం
పాపే రతిం చ సునివార్య మనః సమాధౌ ।
ఆదాయ హృత్కమలమధ్యగతం పరేశం
వారాణసీపురపతిం భజ విశ్వనాథమ్ ॥ 8 ॥
ఫలశ్రుతి
వారాణసీపురపతేః స్తవనం శివస్య
వ్యాఖ్యాతమష్టకమిదం పఠతే మనుష్యః ।
విద్యాం శ్రియం విపులసౌఖ్యమనన్తకీర్తిం
సమ్ప్రాప్య దేహవిలయే లభతే చ మోక్షమ్ ॥
విశ్వనాథాష్టకమిదం యః పఠేచ్ఛివసన్నిధౌ ।
శివలోకమవాప్నోతి శివేన సహ మోదతే ॥
ఇతి శ్రీమహర్షివ్యాసప్రణీతం శ్రీవిశ్వనాథాష్టకం సమ్పూర్ణమ్ ॥
