శ్రీ బిల్వాష్టకం

త్రిదళం త్రిగుణాకారం త్రినేత్రం చ త్రియాయుధం ।
త్రిజన్మ పాపసంహారమ్ ఏకబిల్వం శివార్పణం ॥ 1 ॥

త్రిశాఖైః బిల్వపత్రైశ్చ అచ్ఛిద్రైః కోమలైః శుభైః ।
తవపూజాం కరిష్యామి ఏకబిల్వం శివార్పణం ॥ 2 ॥

కోటి కన్యా మహాదానం తిలపర్వత కోటయః ।
కాంచనం శైలదానేన ఏకబిల్వం శివార్పణం ॥ 3 ॥

కాశీక్షేత్ర నివాసం చ కాలభైరవ దర్శనం ।
ప్రయాగే మాధవం దృష్ట్వా ఏకబిల్వం శివార్పణం ॥ 4 ॥

ఇందువారే వ్రతం స్థిత్వా నిరాహారో మహేశ్వర ।
నక్తం హోష్యామి దేవేశ ఏకబిల్వం శివార్పణం ॥ 5 ॥

రామలింగ ప్రతిష్ఠా చ వైవాహిక కృతం తథా ।
తటాకానిచ సంధానమ్ ఏకబిల్వం శివార్పణం ॥ 6 ॥

అఖండ బిల్వపత్రం చ ఆయుతం శివపూజనం ।
కృతం నామ సహస్రేణ ఏకబిల్వం శివార్పణం ॥ 7 ॥

ఉమయా సహదేవేశ నంది వాహనమేవ చ ।
భస్మలేపన సర్వాంగమ్ ఏకబిల్వం శివార్పణం ॥ 8 ॥

సాలగ్రామేషు విప్రాణాం తటాకం దశకూపయోః ।
యజ్ఞకోటి సహస్రస్య ఏకబిల్వం శివార్పణం ॥ 9 ॥

దంతి కోటి సహస్రేషు అశ్వమేధ శతక్రతౌ ।
కోటికన్యా మహాదానమ్ ఏకబిల్వం శివార్పణం ॥ 10 ॥

బిల్వాణాం దర్శనం పుణ్యం స్పర్శనం పాపనాశనం ।
అఘోర పాపసంహారమ్ ఏకబిల్వం శివార్పణం ॥ 11 ॥

సహస్రవేద పాటేషు బ్రహ్మస్థాపన ముచ్యతే ।
అనేకవ్రత కోటీనామ్ ఏకబిల్వం శివార్పణం ॥ 12 ॥

అన్నదాన సహస్రేషు సహస్రోప నయనం తథా ।
అనేక జన్మపాపాని ఏకబిల్వం శివార్పణం ॥ 13 ॥

ఫలశ్రుతి

బిల్వస్తోత్రమిదం పుణ్యం యః పఠేచ్ఛివ సన్నిధౌ ।
శివలోకమవాప్నోతి ఏకబిల్వం శివార్పణం ॥

ఇతి బిల్వాష్టకం సంపూర్ణమ్ ॥